1 май куни Сардоба сув омборининг ёрилиши натижасида Сирдарё вилоятининг айрим туманлари сув остида қолди. Ҳукумат томонидан тезкор ҳаракатлар натижасида сув тошқини тўхтатилди. Аммо аҳолининг аксар қисми бошпанасиз қолди. Бунга жавобан бутун Ўзбекистон аҳолиси “Биз сиз билан биргамиз” хайрия карвонини ташкил қилишди.
Ўзбекистон Фанлар академияси ҳам бу хайрия ишларидан четда турмай, “Фанлар академияси Сардоба тумани аҳолисига инсонпарварлик ёрдами: Биз сиз билан биргамиз!” номли хайрия карвонини ташкил қилди. Хайрия ишлари пул йиғиш, кийим-кечак, дори-дармон, озиқ-овқат маҳсулоти, болажонлар учун китоб ва ўйинчоқлар сифатида қабул қилинди. Академиянинг барча йўналишдаги институтларидан 1000 дан ортиқ ходимлар ташаббус кўрсатди. ЎзР ФА Ёш олимлар кенгаши ва Касаба уюшмаси томонидан рўйхат шакллантирилди.
ЎзР ФА Шарқшунослик, Математика, Ион-плазма институт ходимлари хайрия карвонини шакллантиришда амалий кўмак беришди. Муҳтарам жамоа томонидан тақдим қилинган буюмлар мазкур карвон таркибида Сирдарё вилоятига жўнаб кетди.
