""Adolat" sosial-demokratik partiya Siyosiy Kengashi raisi"
Yangiliklar (188)
Навоий ва Низомий меросини ўрганиш қардош халқларни янада яқинлаштирмоқда
“Низомий Ганжавий ва Алишер Навоий маданият, адабиёт кунлари” 1 декабрь куни Озарбайжон Республикасида бошланди. 2 декабрдан эътиборан мазкур тарихий воқеликка мамлакатимиз мезбонлик қилмоқда.
Уч кун давом этадиган туркум илмий-бадиий тадбирлар Ўзбекистон Республикаси Фанлар академияси Абу Райҳон Беруний номидаги Шарқшунослик институти, Ўзбекистондаги Ҳайдар Алиев номидаги Озарбайжон Маданият Маркази, Алишер Навоий номидаги Тошкент давлат ўзбек тили ва адабиёти университети, Ўзбекистон-Озарбайжон Дўстлик жамияти, Ўзбекистоннинг Турон кутубхонаси ҳамкорлигида ўтказилмоқда. Туркум тадбирлар Низомий Ганжавийнинг 880, Алишер Навоийнинг 580 йиллигига бағишланган.
Тадбирнинг очилиш маросимида Ўзбекистон Фанлар академияси вице-президенти, Абу Райҳон Беруний номидаги Шарқшунослик институти директори, тарих фанлари доктори, профессор Баҳром Абдуҳалимов нутқ сўзлаб, озарбайжонлик олимлар билан илмий ва гуманитар ҳамкорлик ҳолати ҳамда истиқболлари ҳақида фикр билдирди. Жумладан, “Ўзбек ва озарбайжон халқлари – бир-бирига яқин, қардош халқлар. Адабиётимиздаги уйғунлик эса бизларни янада яқинлаштирмоқда. Дарҳақиқат, Низомий Ганжавий ва Алишер Навоий қаламига мансуб бебаҳо мерос нафақат Марказий Осиё, балки бутун дунё томонидан тан олинган. Бу икки мутафаккир асарларини ўқиш, ўрганишга интилиш ўз давридан то ҳозиргача давом этмоқда. Хусусан, 1945 ҳамда 1947 йилларда улар меросини тарғиб қилишга бағишланган тадбирлар катта миқёсда ўтказилган бўлиб, бу анъанага йиллар оша ҳам содиқ қолинган. Юртимизда устозларни етиштиришга ихтисослашган педагогика университети ҳам Низомий номида экани бежиз эмас. Низомий ва Навоий мероси келажак авлодлар томонидан ҳам ардоқланиб, ўз маърифат нурини улашишига шубҳа йўқ” – дея таъкидлаб ўтди.
Шунингдек, тадбирнинг очилиш маросимида Ўзбекистондаги Озарбайжон Маданият маркази директори, фахрий маданият ходими Самир Аббосов сўзга чиқиб, Низомий ва Навоий асарлари озарбайжон халқи адабиётининг ажралмас қисми эканлигини таъкидлади. “Озарбайжон ва ўзбек халқларининг дунёга танилиши Навоий асарларидан бошланган. Бугун Алишер Навоийнинг “Хамса” ва “Беш рисола” асарларининг озарбайжон тилига таржима қилинган вариантини кўргазмага қўйдик. Низомий ва Навоий ижодларига назар ташласак, мудом туркий миллат орзуларини қаламга олганига гувоҳ бўламиз. Улар меросини ўрганиш бўйича ҳамкорлигимиз давом этади” – деди у.
Тадбир доирасида Низомий Ганжавий ва Алишер Навоий қўлёзма асарлари кўргазмаси ҳамда нашрлари тақдимоти ташкил қилинди. Озарбайжонлик меҳмонлар Ўзбекистон Республикаси Фанлар академияси Абу Райҳон Беруний номидаги Шарқшунослик институтида сақланаётган қўлёзмаларнинг асл нусхалари билан танишиб, катта таассуротга эга бўлдилар. Филология фанлари номзоди, мазкур институтнинг катта илмий ходими Салимахон Эшонова томонидан маълумот берилганидек, ушбу даргоҳ хазинасида Низомий Ганжавийнинг 70 дан ортиқ, Алишер Навоийнинг 200 га яқин қўлёзма асарлари сақланади. Қўлёзмаларнинг аксарияти инжа нақшли зарварақ, унвонлар билан безатилган, гўзал хат намуналарида кўчирилган. Ҳар икки шоир “Хамса” достонлари гўзал унвонлар билан ажратилган. Муқоваларига турунж, бурчак нақшлари, ички муқоваларига абри баҳор ишланган асарлар китобат санъатининг юксак намунлари ўлароқ тадбир иштирокчиларида катта қизиқиш уйғотди.
Кўргазмадан сўнг бошланган нашрлар тақдимотида олимлар, нашр муаллифлари ўз маърузаларида Низомий Ганжавий ва Алишер Навоий адабий мероси, бу икки шоир, икки халқ ўртасидаги адабий алоқалар тарихи ва аҳамиятини атрофлича ёритиб бердилар.
Тадбир доирасида Ўзбекистоннинг “Турон” кутубхонаси ахборот-ресурс маркази ва Озарбайжоннинг Шуша тумани Марказлаштирилган кутубхонасининг ўзаро ҳамкорлик меморандуми имзоланди.
https://adolat.uz/news/navoij-va-nizomij-merosini-organish-qardosh-halqlarni-yanada-yaqinlashtirmoqda
Улуғ саркарда Жалолиддин Мангуберди кўмилган жойини тадқиқ этиш ва изланиш
ЎзР ФА Абу Райҳон Беруний номидаги Шарқшунослик иснтитути илмий ходими Ҳилола Назирова Хоразм вилояти ҳокимлиги таклифига биноан шу йилнинг 15-18 октябрь кунлари Хоразм вилояти ҳокимлиги ва Республика Маънавият ва маърифат маркази делегацияси таркибида Туркиfя Республикасида илмий сафарда бўлди.
Сафардан мақсад сўнгги Хоразмшоҳ Жалолиддин Мангубердининг топилган қабри ва у билан боғлиқ бошқа маълумотларни ўрганиш ҳамда Туркиянинг Диёрбакир шаҳрида “Силван ва Султон Қиличарслон” халқаро симпозиумида иштирок этиш эди.Симпозиум доирасида Ўзбекистон Республикаси Жамоат хавфсизлиги университети профессори Жумабой Раҳимов, Республика Маънавият ва маърифат маркази Хоразм вилояти бўлими раҳбари, “Жалолиддин Мангуберди” фонди раиси Бекзод Абдиримов, шу билан бирга туркиялик олимлар Жалолиддин Мангуберди ҳақида маъруза қилди.
Очилиш маросимида сўзга чиққан Бекзод Абдиримов делегация вакилларининг асосий мақсадлари, ўзаро илмий ҳамкорлик, Султон Жалолиддин Мангубердининг Шарқ халқлари тақдирида тутган ўрни ҳақида сўзлади. Шундан сўнг сўзга чиққан Диярбакир вилояти валийси Мунир Каралўғлу Султон Жалолиддин Мангубердининг қабри жойлашган ҳудуд ҳақидаги маълумотлар тасдиқланса, бу жойда мақбара бунёд қилиниши ҳақида айтиб ўтди. Шўъба йиғилишида сўзга чиққан Жумабой Рахимов ҳам Султон Жалолиддин Мангубердининг жасорати ва ватанпарварлиги бугунги халқлар учун ибрат мактаби эканлиги тўғрисида сўз юритди.
Институт илмий ходими Ҳилола Назирова томонидан Ўзбекистон ОАВлари учун махсус репортажлар тайёрланди.
https://www.youtube.com/watch?v=TBOuNNAlQ_0
https://www.youtube.com/watch?v=K3miiRK5q-4
Sharq qo’lyozmalariga bag’ishlangan xalqaro anjuman o’tkazildi
Аvval xabar qilganimizdek, joriy yil 16-19-noyabr kunlari Oʼzbekiston Respublikasi Fanlar akademiyasi Аbu Rayhon Beruniy nomidagi Sharqshunoslik instituti va Аvstriya Fanlar akademiyasi Eronshunoslik instituti bilan hamkorlikda “Markaziy Osiyo Sharq qoʼlyozma madaniyati: qoʼlyozmalar madaniy meros va tarixiy manba” (Central Asian Islamic Manuscript Cultures: Manuscripts as Cultural Heritage and Historical Source) mavzusida xalqaro ilmiy anjuman oʼtkazildi. ZOOM platformasi orqali boʼlib oʼtgan ushbu anjumanda nafaqat raespublikamizdan, balki Аvstriya, Buyuk Britaniya, Germaniya, Gollandiya, Turkiya, Tojikiston, Qozogʼiston kabi davlatlardan yetakchi soha mutaxassislari, yosh tadqiqotchilar oʼz maʼruzalari bilan ishtirok etdi.
Аnjumanning yalpi majlisida OʼzR FА Sharqshunoslik instituti direktori, professor Bahrom Аbduhalimov soʼzga chiqib anjumanni ochib berdi. Shundan soʼng, Аvstriya Fanlar akademiyasi Eronshunoslik instituti direktori doktor Florian Shvarts nutq soʼzlab, anjuman ishtirokchilarini qutladi.
Shuningdek, Buyuk Britaniyaning Kembrij universiteti professori Charlz Melvill, Gollandiyaning Leyden universiteti professori Yelena Paskaleva ham soʼzga chiqib, anjuman ishiga muvaffaqiyat tiladilar.
Аnjuman doirasidagi “Oʼzbekistonda islom madaniyati, tarixi va sanʼatini oʼrganishning yangi istiqbollari” mavzuidagi akademik Ubaydulla Karimov xotirasiga bagʼishlangan xalqaro anjuman maqolalari toʼplamining taqdimoti boʼl o’tdi. To’plam bo’yicha Islom hamkorligi tashkiloti islom tarixi, sanʼati va madaniyatini tadqiq etish markazi (IRCICA) bosh direktori professor Mahmud Erol Qilich soʼzga chiqib, olib borilayotgan ilmiy hamkorlik koʼlami va ahamiyati hamda ilmiy anjuman haqida alohida toʼxtaldi.
Uch kun davom etgan xalqaro anjuman ishida matnlarni tadqiq va nashr qilish, yozma madaniy merosni asrash, ularni oʼrganish boʼyicha soʼnggi yillarda olib borilayotgan ilmiy tadqiqotlar, istiqbolli loyihalar boʼyicha qiziqarli maʼruzalar tinglandi, oʼzaro fikr almashildi va muhokama qilindi.
https://academy.uz/uz/news/sharq-qolyozmalariga-bagishlangan-xalqaro-konferensiya-otkazildi
Sharq qoʼlyozmalariga bagʼishlangan xalqaro ilmiy anjuman
Sharq qoʼlyozmalariga bagʼishlangan xalqaro ilmiy anjuman
https://www.youtube.com/watch?v=bNhhQ-vt50k
ИБН СИНO НOМИДАГИ ИСЛOМ МАДАНИЯТИНИ ЎРГАНИШ ТАДҚИҚОТ ЖАМҒАРМАСИ (МOСКВА) ТОМОНИДАН КИТOБ СOВҒАСИ
2021 йилнинг 4 ноябрь куни Ўзбекистон Республикаси Фанлар академияси Абу Райҳон Беруний номидаги Шарқшунослик институти кутубхонасига Ибн Сино номидаги Ислом маданияти ўрганиш тадқиқот жамғармаси (Москва) томонидан мусулмон Шарқи тарихи, фалсафаси, маданияти, илм-фан тарихининг турли жиҳатлари ва таниқли ислом олимлари биографиясига бағишланган 25 та ажойиб илмий фундаментал китоблар совға сифатида топширилди.
Ибн Сино номидаги Ислом маданиятини ўрганиш тадқиқот жамғармаси 2007 йилда ташкил этилган бўлиб, ислом маданияти, илм-фани ва фалсафасини ҳар томонлама ўрганувчи илмий ва талабалар жамоатчилиги вакилларини бирлаштиради. Ибн Сино жамғармаси асосчилари фалсафа фанлари доктори Ҳамид Ҳадавимогаддам ва Россия Фанлар академияси Шарқ қўлёзмалари институти етакчи илмий ходими Станислав Михайлович Прозоров ҳисобланади. Жамғарманинг асосий вазифаси − ислом маданиятининг меросини илмий жамоатчилик билан таништиришдан иборат.
Жамғарма Россиядаги ислом динининг турли масалаларини ўрганиш билан шуғулланувчи етакчи марказлар билан ҳамкорликда нашриёт, таълим, маърифат йўналишидаги лойиҳаларни амалга оширади ҳамда илмий анжуман, тақдимот ва кўргазмалар ташкил этишда иштирок этади. Бундан ташқари, айни пайтда жамғарма ҳомийлигида ўнга яқин илмий ва илмий-оммабоп адабиётлар туркуми нашр этилмоқда. Шунингдек, Жамғарма ислом фалсафасининг “Ишроқ” йилномасини нашр этади, унда рус ва хорижий олимларнинг энг аҳамиятли илмий мақолалари чоп этилади.
Ўзбекистон Фанлар академияси Шарқшунослик институти жамоаси ушбу китоблар жамланмаси учун барча ташкилий масалаларини ўз зиммасига олган Ибн Сино жамғармаси раҳбариятига, хусусан, Жамғарманинг илмий ишлар бўйича директори Андрей Александрович Лукашевга чуқур миннатдорчилик билдиради. Шубҳасиз, беғараз тақдим қилинган мазкур китоблар Институт кутубхонаси тадқиқотчиларига мусулмон оламининг бой тарихи ва маданиятини ўрганишда, шунингдек, Ибн Сино жамғармасининг мамлакатимиздаги маънавий ва маърифий фаолиятини кенг тарғиб этишда муҳим аҳамият касб этади.
Ибн Сино номидаги Ислом маданиятини ўрганиш тадқиқот жамғармаси томонидан Ўзбекистон Республикаси Фанлар академияси Шарқшунослик институти кутубхонаси учун совға қилинган китоблар рўйхати:
- Ars Islamica: в честь Станислава Михайловича Прозорова /сост. и отв. ред. М.Б. Пиотровский, А.К. Аликберов; Ин-т востоковедения РАН. – М.: Наука – Вост. лит., 2016. – 871 с.
- Абутораб С. Бейт ал-хикма. История академии наук на Востоке. – М.: Садра, 2019. – 524 с.
- Азарбайджани, Мусави-асл. Введение в психологию религии // Пер. Д. Бибаев. – М.: Вече, 2012. – 192 с.
- Ал-Вири М. Изучение ислама на западе. – М.: Садра, 2016. – 324 с.
- Ал-Испиджаби Даулатшах. Бурхан аз-закарин («Доказательство для понимающих») / Пер. с перс. А.К. Бустанов, Е.Л. Никитенко; Ред. Б.М. Бабаджанов. – М.: Садра, 2020. – 240 с.
- Беккин Р. А.Э. Шмидт: биография, научная переписка, избранные труды, библиография. – М.: САДРА, 2018. – 503 с.
- Видясова М. Египет: от Насера до наших дней. – М.: Садра, 2020. – 248 с.
- Ефремова Н. Ислам: философия, религия, культура. – М.: Наука, 2015. – 183 с.
- Идейные процессы в Иране / Пер. И. Гибадуллин; ред. М.М. Аль-Джанаби. М.: Садра, 2017. – 224 с.
- Ислам на территории бывшей Российской империи. Энциклопедический словарь. Том 2 / Сост. С.М. Прозоров. – М.: Садра, 2018. – 645 с.
- Исламская цивилизация (История и современность) / Пер. И. Гибадуллин. – М.: Садра, 2016. – 276 с.
- Ишрак. Философско-исламский ежегодник. Выпуск 9. – М.: Садра, 2019. – 424 с.
- Калинина Т., Жантиев Д., Войтенко А. Пространства и смыслы. Памятные страницы истории Арабского Востока. – М.: Садра, 2018. – 272 с.
- Келичхани Х.-Р. Иранская каллиграфия: Знакомство с традицией. – М.: Садра, 2019. – 408 с.
- Лукашев А. А. Мир смысла в немногих словах. Философские взгляды Махмуда Шабистари в контексте эпохи. – М.: Садра ,2020. – 320 с.
- Мусульмане в новой имперской истории / Ред. В. Бобровников, С. Глебов, А. Каплуновский. – М.: Садра, 2017. – 424 с.
- Прозоров С.М. Ислам как идеологическая система. Том 2. – М.: Наука - Восточная литература, 2016. – 368 с.
- Рейснер М., Ардашникова А. Персидская литература IX–XVIII веков. Том 1. – М.: Садра, 2021. – 408 с.
- Рейснер М., Ардашникова А. Персидская литература IX–XVIII веков. Том 2. – М.: Садра, 2021. – 384 с.
- Санаи М. Взаимоотношения Ирана и Центральной Азии: тенденции и перспективы. – М.: Вече, 2020. – 320 с.
- Сибгатуллина А. Контакты тюрок-мусульман Российской и Османской империй на рубеже XIX-XX вв. – М.: Исток, 2010. – 264 с.
- Смирнов А.В., Насыров И.Р., Фролова Е.А. История арабо-мусульманской философии. – М.: Академический проект, 2013. – 255 с.
- Фрагнер Б. Персофония.Регионализм, идентичность, языковые контакты в истории Азии / Пер. Б. Сагетдинов. – М.: Садра, 2018. – 136 с.
- Шабистари, Махмуд. Цветник тайны (персидский текст поэмы, перевод, комментарий) / А. А. Лукашев; отв. ред. Н. Ю. Чалисова. – М.: Садра, 2021. – 360 с.
- Шихсаидов А., Наврузов А. и др. Каталог арабских рукописей и старопечатных книг. Коллекция Дийа’аддина Йусуф-хаджжи ал-Курихи. – М.: Восточная литература, 2011. – 192 с.
Самарали хорижий сафар
2021 йил 7-9 октябрь кунлари Туркия Республикаси Истанбул шаҳрида Туркия Республикаси Маданият ва Туризм вазирлиги, Истанбул университети, Фотиҳ Султон Меҳмет вақф университети ва профессор Фуат Сезгин ислом фан тарихи тадқиқотлари фонди ҳамкорлигида ташкиллаштирилган “Иккинчи халқаро профессор Фуат Сезгин Ислом фан тарихи симпозиюмида” "Ибн Сино Тиб қонунлари қисқартмалари ва уларнинг ўрта аср тиббий таълимининг ривожидаги ўрни" мавзусида маърузачи сифатида иштирок этдим. Симпозиумга Эрон, Миср, Голландия ва бошқа мамлакатлардан ташриф буюрган олимлар билан фикр алмашдим.
Тиб қонунлари қисқартмалари, уларнинг нусхалари, сақланиш ўрни, уларнинг кейинги давр тиббий мактабларига таъсири масаласини муҳокама қилдим. Натижада Эроннинг Теҳрон шаҳрида 12-15 ноябр кунлари ўтказиладиган “ Тиббий фанларни ривожида Эрон ва Туркиянинг қўшган ҳиссаси” мавзуидаги конференцияга таклиф этилдим ва унда “Мўъжаз ал-Қонун” асари ва унинг Туркия фондаларидаги қўлёзмалари” мавзусида маъруза билан иштирок этаман. Шунингдек, 19-20 ноябр кунлари Туркиянинг Испартада шаҳрида саломатлик хизматлари фанлари билан боғлиқ симпозиумда “Тиб қонунлари қисқартмалари ва уларнинг Туркия кутубхоналарида қўлёзмалари” мавзусида маърузачи сифатидап иштирок этишим режалаштирилган.
Симпозиумдан сўнг 20.10.2021 да Туркиянинг Баҳчешеҳир университети тиб факультетида "Ибн Сино Тиб қонунлари қисқартмалари ва уларнинг ўрта аср тиббий таълимининг ривожидаги ўрни" мавзуси доирасида семинар ўтказдим ва сертификат билан тақдирландим.
Симпозиумдан сўнг Сулаймония кутубхонасида икки ҳафта мобайнидав тадқиқот ишларини олиб бориб, илмий ишимга керакли манбаларни топдим.
Ушбу илмий сафарим давомида Ибн Синонинг Туркиядаги қўлёзмалари тўғрисида “Истанбул” газетасида интерью бердим.
Шунингдек, Сулаймония кутубхонасида туркиялик синошунос олим Ферруҳ Ўзпилавчи ва менинг ҳамкорлигимда “Ўзбекистон тарихи” телеканалининг “Халқ мулки” кўрсатуви учун Ибн Сино ҳақида кўрсатув тайёрланди.
Ф. Ибрагимов
ЎзРФА Шарқшунослик институти
Шарқ халқлари фани ва маданияти
тарихи бўлими кичик илмий ходими
MUHIM YIG`ILISH
(“Yilning eng faol Yosh olimlar kengashi” tanloviga bag`ishlangan)
Bugun (2021-yil 8-noyabr kuni) O’zR FA ShI Yosh olimlar kengashi tomonidan “Yilning eng faol yosh olimlar kengashi” tanlovi bo’yicha yig’ilish bo’lib o’tdi.
Tanlov shartlari bilan YOK raisi Hilola Nazirova YOK a’zolarini tanishtirdi. Yig’ilishda Fanlar akademiyasi Davlat va huquq instituti YOK raisi Kvintkov Yaroslav ham qatnashdi.
P.S. 2019 yilda O’zR FA SHI Yosh olimlar kengashi bosh sovrin gran-pri sohibi bo’lgan.
More...
«Siyosatda olim sifatida ko‘rinishni afzal bilaman» – Bahrom Abduhalimov bilan intervyu
24 oktabr kuni O‘zbekistonda prezidentlik saylovi bo‘lib o‘tadi. Ayni kunlarda saylovda ishtirok etadigan beshta siyosiy partiya yetakchilari aholi orasida o‘z targ‘ibot tadbirlarini o‘tkazmoqda.
Kun.uz prezidentlikka nomzod siyosatchilar bilan saylovchilarni qiziqtirgan qator masalalar bo‘yicha intervyular uyushtirmoqda. Turkum doirasida birinchi mehmonimiz – «Adolat» SDPdan prezidentlikka nomzod Bahrom Abduhalimov bo‘ldi.
— Prezidentlikka nomzod Bahrom Abduhalimov bugungi O‘zbekistonning qiyofasini qanday tasavvur qiladi? Shuningdek, uning qaysi jihatlarini jiddiy o‘zgarishlarga muhtoj deb hisoblaydi?
— O‘zbekiston keyingi yillarda, xususan, oxirgi 5 yilda tubdan o‘zgardi. Sovet davri, mustaqillikning ilk yillari va so‘nggi 5 yillikda yashagan kishi sifatida davrlarni o‘zaro taqqoslash imkoniyatiga egaman.
Avvallari dunyo hamjamiyati O‘zbekistonni islohotlarni xohlamaydigan, sekin harakat qiladigan va islohotlardan qochadigan davlat sifatida bilardi. Keyingi davrlarda esa O‘zbekiston nafaqat Markaziy Osiyo, balki dunyo miqyosida ham islohotlar bo‘yicha lider mamlakatlardan biriga aylandi.
— Savolning ikkinchi qismi bo‘yicha ham javob bersangiz, chunki agar hammasi yaxshi ketayotgan bo‘lsa, sizning prezidentlikka nomzodingizni qo‘yishingizning ham keragi bo‘lmasdi.
— O‘zbekiston hozir ma'lum darajaga yetib keldi, lekin bundan buyog‘iga yangi bosqich boshlanishi kerak. Shu nuqtayi nazardan erishganlarimiz o‘zimiz bilan birga, ayni vaqtda yangi davr boshlanyapti. Bizda deyarli barcha sohalarda qiladigan ishlarimiz yetarli. Bu iqtisodiy, ijtimoiy, qishloq xo‘jaligi yoki ekologik yo‘nalishdagi muammolar.
— Bahrom aka, hozir mutlaq ko‘pchilik O‘zbekiston prezidenti saylovining muqarrar g‘olibi sifatida bir shaxs – Shavkat Mirziyoyevni e'tirof etyapti. Ya'ni saylovlarda ayni bir nomzoddan boshqasiga ishonilayotgani yo‘q.
Saylovlarga bunday munosabatning sabablari nimalarda deb o‘ylaysiz?
— Shak-shubha yo‘qki, Mirziyoyev yangi O‘zbekistonni qurishda asosiy islohotchi bo‘ldi. Prezident va inson sifatida nihoyatda salohiyatli. Buni yaxshi tushunaman. Xalqning unga munosabati ham tabiiy. Lekin shu bilan birga partiyamiz ham saylovlarga xalqimizni ko‘pdan buyon qiynab kelayotgan muammolarni yechish bo‘yicha takliflari, yangi g‘oyalari bilan chiqadi. Agar ular amalga oshirilsa, O‘zbekiston o‘z taraqqiyotining yangi bosqichiga chiqishi mumkin.
— Bahrom Abdurahimovich, siz O‘zbekistonning birinchi ma'muriyati davrida prezidentning diniy masalalar bo‘yicha maslahatchisi vazifasida ishlagansiz. Va aynan mana shu paytda O‘zbekistonda ommaviy repressiyalar, ommaviy qamashlar, qarindosh-urug‘chilik asosidagi ta'qiblar, dindorlarga nisbatan har xil rasmiy va norasmiy «qora ro‘yxatlar» ham avj olgandi. Aytingchi, siz shu davrda ishlagan rahbarlardan biri sifatida qanday nomzod bo‘lib saylovga kiryapsiz?
— Ha, men prezident maslahatchisi sifatida ishlaganman. O‘sha paytda garchi ichkarida aytilmagan bo‘lsa-da, xorijda O‘zbekistonni yopiq davlat, diniy sohada qattiq zug‘umlar olib boradi degan ayblovlar bilan juda qattiq tanqid qilinardi. Lekin shuni aytish kerakki, o‘sha davrdagi faoliyatim menga juda katta maktab bo‘lgan. Chunki bir jarayonni pastdan va yuqoridan kuzatish imkoniyati bo‘ldi.
Hayot doim ham bir maromda davom etmaydi. O‘sha paytda yechilmagan muammolar bugun yechilishi ham bugun katta ahamiyat kasb etishi mumkin.
— Yuqorida ham aytganimdek, saylovlar oldidan ko‘pchilik sizga tajribasiz bir nomzod, siyosatni tushunmaydigan, ilm odami deb qarayapti. Lekin siz bundan avval prezident maslahatchisi sifatida ham ishlaganingizni aytdik. Ammo siz o‘zingizni bu tajribangizni negadir ko‘z-ko‘z qilmayapsiz. Hamma joyda o‘zingizni olim sifatida taqdim etyapsiz. Bunga sabab nima nima?
— Men siyosatda olim sifatida ko‘rinishni afzal hisoblayman. Ammo bu siyosatni tashlab faqat olimlik qilishni bildirmaydi. Mendan avvalgi intervyularda olimdan siyosatchi yoki prezident chiqadimi, deb so‘rashdi. Biz tarixga murojaat qilsak. Bunday tajribalar bor. Masalan, Amir Temurning nabirasi Mirzo Ulug‘bek 40 yildan ortiq davlatni ham boshqargan va olimlik ham qilgan. Bu esa o‘zining yaxshi natijasini ko‘rsatgan.
Mening ma'lumotnomamga qarasangiz, sharqshunosman. Toshkent davlat universitetida shu yo‘nalishda o‘qiganman. Bunda bizning asosiy yo‘nalishimiz siyosat edi.
Keyinchalik ham men xorij mamlakatlarida uzoq muddat ishlab, tajriba oshirdim. Umuman olganda sharqshunoslikni o‘zagi bu siyosat. Rossiyada ham katta-katta siyosatchilarning ko‘pchiligi sharqshunoslar. Shu tufayli ham men o‘zimni siyosatda yangi inson deb hisoblamayman.
Intervyuni to‘liq holda yuqoridagi video orqali tomosha qilishingiz mumkin.
Ilyos Safarov suhbatlashdi.
Tasvirchi va montaj ustasi – Muhiddin Nido. Ⓣ
https://kun.uz/uz/news/2021/09/28/siyosatda-olim-sifatida-korinishni-afzal-bilaman-bahrom-abduhalimov-bilan-intervyu
Ота-оналарнинг бир қисми нега бошларини чангаллаб қоляпти? Болалар-чи? — "Адолат" СДП вакили таълим тизимидаги айрим жиддий хатолар ҳақида фикр билдирди
Коррупция – мудҳиш иллат, айниқса у таълим тизимини ўз чангалига олса, икки карра фалокат. Яқин-яқингача коллежу университетлар у ёқда турсин, боғча-мактабга кириш ҳам «қистир-қистир»ларсиз битмас эди. Айниқса, шаҳарда донг таратган «престиж» боғча ва мактаблар фақат «каттакон»ларнинг болаларини «юқори»дан қўнғироқ асосида қабул қилиб, маҳаллий аҳолига жой қолдирмаслиги кўп бор исботини кўрсатган.
Мазкур коррупциоген ҳолатларнинг олдини олиш, мактабгача таълим ташкилотига жойлаш учун мудиранинг, мактабга қабулда директорнинг чўнтагини қаппайтиришга барҳам бериш учун шаффоф тизимлар яратилди. МТТларга Давлат хизматлари агентлиги орқали навбат ташкил қилиш йўлга қўйилгани кўплаб ота-оналарнинг кўнглидаги иш бўлди.
Бу йилдан умумтаълим мактабларига қабул ҳам электрон шаклда my.maktab.uz портали орқали амалга ошириладиган бўлди. Электрон тизимга ўтилгани, албатта, яхши, ортиқча овогарчиликлару харажатларга ҳожат қолдирмайди. Аммо, айрим жамоатчилик вакилларининг таъкидлашларича, ушбу тизимга ишониб фарзандини бу йил мактабга жойлолмай қолган, сентябрь ойи — янги ўқув йили бошланганига қарамай, ҳамон фарзандининг ҳужжатлари қўлида турган ота-оналар бор.
Ўрнатилган тартибга кўра, ота-оналардан сайт орқали маълумотларни тўлдириш ва жараённи кузатиб бориш талаб этилган. Бу босқични бажарганлар ёз бўйи ҳар куни кўзи тўрт бўлиб сайтдаги шахсий саҳифасини кузатган ва «кўриб чиқилмоқда» ёзувини ўқиб келган. Кимлардир навбати келгани ҳақида хабар топиб, боласини мактабга жойлашга муваффақ бўлди. Аммо ота-оналарнинг бир қисми август ойининг охирги кунларида сайтдаги «қайтарилди» деган ҳукмни ўқиб бошларини чангаллаб қолишди. Хўш, энди нима бўлади? Мактаб ёшига етган болалар мактабга чиқолмай қолиб кетаверадими? Хўп, қамров юқорилиги боис ўзи танлаган мактабида бўш жой қолмагандир, бу ҳақида аввалроқ хабар бериш, ота-оналар учун бошқа мактаб учун ҳаракат қилиш имконини қолдириш мумкинмиди?
Аввалги тизим коррупция хавфи остида деб, бошқа тизим яратилгани мақсадга мувофиқ, бироқ болаларда нима айб? «Ўқувчи бўламан, Президентдан совға оламан», дея энтикиб турган мурғак қалблар 6 сентябрь куни уйда мунғайиб қолсалар, бизга коррупциядан ҳоли тизимга тасанно ўқиб ўтириш ярашармикин?
Болаларни мактабгача таълим муассасаларига имкон қадар кўп қамраб олиш ҳақида кўп гапирилди, таклифлар берилди, аммо ҳозирги вазиятда МТТдан ҳам муҳимроқ ва долзарброқ бўлган мажбурий таълимга жалб этиш ҳам ўз оқсоқлигини беркитолмаяпти. Вақтида мактабга чиқиб, керакли таълимни олмаган, бу борада бир йил ютқазган, устига устак ҳамма нарсасини тахт қилиб қўйган ҳолда мактабга бориш орзуси саробга айланган болакайлардан эртага юқори натижани талаб қилишга ҳақлимизми?
Боғчадан чиқарилган, мактабга қабул қилинмаган ўқувчилар аросатда қолиб кетди.
Халқ таълими вазирлиги масалага жиддий қараб, олдиндаги оз фурсат ичида ана шу ўқувчилар фойдасига бирор маънили қарор қабул қилади, деган умиддамиз. Зотан, ибтидо интиҳони ҳал қилади. Фарзандларимиз таълимининг илк пиллапоялариданоқ керакли шароитларни яратиб берайлик.
Баҳром АБДУҲАЛИМОВ,
«Адолат» СДП Сиёсий Кенгаши раиси
https://xs.uz/uzkr/post/ota-onalarning-bir-qismi-nega-boshlarini-changallab-qolyapti-bolalar-chi-adolat-sdp-vakili-talim-tizimidagi-ajrim-zhiddij-khatolar-haqida-fikr-bildirdi